Gözdaxili təzyiqi ölçərkən xəta baş verə bilərmi? Yəni əlimizə gələn rəqəmlər bizi aldada bilərmi? Əlbəttə!
Ölçdüyümüz metoda görə, ölçdüyümüz cihaza görə və ölçənin diqqətinə görə fərqliliklər ortaya çıxa bilir. Fərqliliklər deyərkən, əslində əgər hər şey ideal qaydadadırsa, fərqlilik olmamalıdır. Amma hansı hallarda biz yanlış rəqəmlərlə qarşılaşa bilərik.
Xəstə müayinə zamanı başını cihaza düz qoymayıbsa
Birinci yanlış rəqəmə ən çox rast gəldiyimiz hal xəstələrin cihazda baş pozisiyasının düzgün yerləşdirilməməsi ilə bağlıdır. Yəni xəstə tam rahat vəziyyətdə çənəsini qoymalıdır və alnını dayanmış olmalıdır.
Bəzən xəstə çənəsini qoyur, alını dayamır və ya alını dayayır, çənəsi sinəsinə doğru gəlir. Çox sıxılmış olur. Yəni burada həm texniki fərq olur, həm də həqiqi fərq olur.
Həqiqi fərq nədir?
Çənənizi boğazınıza sıxdığımız zaman yuxu arteriyaları, yuxu venaları sıxılmış olur. Yuxu venası sıxılınca avtomatik olaraq gözdaxili təzyiqimiz yüksəlmiş olur. Ona görə xəstələrinin baş pozisiyası çox önəmlidir.
Hətta bəzi cihazlar var ki, artıq ona da nəzarət edir. iCare-nin yeni nəsil cihazları var, onlar artıq ona nəzarət edir. Xəstənin baş pozisiyası doğrudurmu? Yəni “Bu ölçümə, bundan sonra ölçəcəyimiz rəqəmə nə qədər güvənə bilər?” deyilən cihazın özünün artıq xəbərdaredici məlumatları olur.
Xəstə müayinə əsnasında gözünü sıxırsa
İkinci, xəstələr çox həssas olur, anormal dərəcədə gözlərini sıxırlar.
Xəstələr bilirlər ki, oradan hava üfürüləcək. O hava üfürülüncə artıq gözlərini çox sıxırlar və gözə sıxar-sıxmaz, istər-istsəməz, ətrafdakı əzələlər gözün özünü sıxır, göz sıxılınca da, yenə də təzyiq fərqli çıxa bilir.
Xəstənin akkomodasiya əzələləri çox güclüdür
Üçüncü, bəzən olur xəstələrin akkomadasiya əzələləri çox güclü olur.
Bu nə deməkdir?
Xəstənin gözündə +6 var dərəcə olaraq, amma xəstə 100% görür. Yəni düşünün, müsbət 6-nı sıfırlayacaq qədər gözün daxilindəki əzələlər güclü işləyir. Həmin akkomodasiya əzələləri də sıxılanda istər-istəməz quzehli qişa yerini dəyişmiş olur və gözaqlı təzyiq oynaya bilir. Yəni onun nəticəsində də biz yanlış rəqəmlərlə qarşılaşa bilərik.
Buynuz qişa ilə bağlı problemlər varsa
Daha sonra çox anormal nahamar buynuz qişa səthi olanlarda və buynuz qışa anormal ödəmli olanda, bulyoz keratopatiya olanlarda, endotel yetməzliyi olanlarda buynuz qişa həddən artıq çox ödəmli olur. Xəstənin təzyiqi ölçülür. Baxırsan, təzyiq gəlib 42! Sən qorxursan ki, təzyiq yüksəkdir! Amma palpator baxırsan, yoxlayırsan ki, əslində 42 deyil, təzyiq norma daxilindədir.
Gözdaxili təzyiqi səhv ölçməmək üçün nə etmək lazımdır?
Yanlış rəqəmlərlə mübarizə üçün:
- cihazlarımız vaxtında sazlanmalıdır,
- texniki əməkdaşlar kifayət qədər yetişdirilməlidir, təlimatlandırılmalıdır,
- həkimin özü diqqətli olmalıdır.
Çünki, yekunda biz neçə ildir bu işin içərisindəyik, xəstənin gözünün vəziyyəti və rəqəmlər üst-üstə düşməlidir. Bəzən baxırsan, bunlar üst-üstə düşmür. Yəni artıq biz şübhələnirik. Biz şübhələndiyimiz halda, istənilən halda müayinələri təkrarlayırıq.
